បន្ទាយមានជ័យ៖ សមត្ថកិច្ចព្រំដែនបានឃាត់ខ្លួនអ្នកបើកបររថយន្តម្នាក់បម្រុងដឹកពលរដ្ឋចំនួន ១៣នាក់លួចឆ្លងដែនដោយខុសច្បាប់ទៅប្រទេសថៃ កាលពីវេលាម៉ោង១២យប់ ឈានចូលថ្ងៃទី១៧ ខែមីនា ឆ្នាំ២០២២ នៅចំណុចផ្លូវលំក្នុងភូមិចំបក់ ឃុំបឹងបេង ស្រុកម៉ាឡៃ ខេត្តបន្ទាយមានជ័យ។
សមត្ថកិច្ចបានឱ្យដឹងថាប្រជាពលរដ្ឋដែលបម្រុងលួចឆ្លងដែនខុសច្បាប់ទៅប្រទេសថៃមានចំនួន ១៣នាក់ ក្នុងនោះស្រី ៥នាក់ កុមារ ១នាក់ ត្រូវបានឃាត់ខ្លួនជាមួយរថយន្ដ ១គ្រឿង ម៉ាកនីសាន់ ពណ៌ទឹកប្រាក់ ស្លាកកលេខ ២B -៣៤៤៣ ដែលមានអ្នកបើកបររថយន្តអាយុ ៤០ឆ្នាំ រស់នៅភូមិចំបក់ ឃុំបឹងបេង ស្រុកម៉ាឡៃ ខេត្ដបន្ទាយមានជ័យ។
បច្ចុប្បន្នសមត្ថកិច្ចបានបញ្ជូនពលរដ្ឋចំនួន ១៣នាក់ទៅមណ្ឌលចត្ដាឡីស័ក ចំណែកតៃកុងរថយន្ដបានបញ្ជូនទៅបញ្ជាការដ្ឋានកងរាជអាវុធហត្ថខេត្ដបន្ទាយមានជ័យដើម្បីចាត់វិធានការបន្តតាមនីតិវិធីច្បាប់៕
